Phillip Garrido, sem rændi Jaycee Dugard og hélt henni á heimili sínu í mörg ár þar sem hún ól honum börn, segist vera breyttur maður. Garrido sendi fjölmiðlum bréf um helgina, þar sem hann sagðist vilja biðja allt mankynið afsökunnar á því sem hann gerði. „Í gegnum anda Jesú Krists, hef ég læknast af kynlífsbrenglun minni,“ segir í bréfi Garrido.

Lögmaður hans tekur undir með Garrido og segir hann breyttan mann. „Umbjóðandi minn er miður sín.“ Fjölmiðlar vestanhafs fengu álit lagaprófessors á bréfi Garrido. „Þetta er hálfgerð afsökunarbeiðni en það er greinilegt að hann tekur ekki fulla ábyrgð á gjörðum sínum,“ segir í umsögninni um bréfið.

Garrido hefur verið iðinn við að senda fjölmiðlum bréf úr fangelsinu, hann hefur áður haldið því fram að lögreglan hefði skert málfrelsi Jaycee Dugard, enda hefur hún lítið sem ekkert tjáð sig síðan hún losnaði úr prísundinni fyrr í sumar.