Indverjinn Manjit Singh, sem nú er breskur ríkisborgari, setti á dögunum nýtt og glæsilegt heimsmet þegar hann dró strætisvagn rúma tuttugu metra á hárinu. Singh, sem er 59 ára gamall, segir í samtali við Telegraph að hann hafi ekki hugmynd um af hverju hann er gæddur þessum óvenjulega hæfileika. „Ég nota bara venjulegt sjampó sem ég kaupi í næstu verslun.“

Þetta er ekki í fyrsta skipti sem Singh reynir að setja óvenjulegt heimsmet. Fyrir tveimur árum reyndi hann að draga jafnstóran strætisvagn á eyrunum en hafði þá ekki erindi sem erfiði. Hann ákvað því að reyna að draga hann á hárinu og það gekk eins og í sögu. Heimsmetstilraun Singhs var hluti af hátíð Heimsmetabókar Guinness sem haldin er árlega um allan heim. Sjón er sögu ríkari en myndbandið af Singh má sjá hér að neðan: