Neytendasamtökin hvetja olíufélögin til að taka upp fyrri starfshætti og birta á heimasíðum sínum verð á eldsneyti á öllum stöðvum sem þau reka. Frá árinu 2004 hefur dregið úr miðlun upplýsinga á bensínverði á netinu.

Á þeim tíma birtu öll olíufélögin á heimasíðum sínum verð á einstökum stöðvum nema Olís, sem birti eingöngu verð á stærstu stöðvunum. N1 fylgdi í kjölfarið og birti aðeins algengasta verðið en nú birtir N1 aðeins lægsta verðið. Olís fylgdi á eftir og nú síðast Shell, að því er kemur fram á heimasíðu samtakanna. Þetta harma Neytendasamtökin. Þess má geta að Orkan, Atlantsolía og ÓB birta verð á öllum stöðvum.

Árétting
Á heimasíðu Shell má finna upplýsingar um verð á öllum afgreiðslustöðvum, ef smellt er á hnappinn „Einstaklingar“ og svo „eldsneytisverð“.