Gylfi Magnússon, viðskipta- og efnahagsráðherra, segir að það geti endað með ósköpum ætli ríkið að fjármagna hallann á ríkisrekstrinum með lántökum. Þess vegna verði að hækka skatta og hafa þá jafn háa eða sambærilega og þeir eru annars staðar á Norðurlöndunum.

Þetta sagði Gylfi í kvöldfréttum RÚV.

Ekki eru allir á eitt sáttir með boðaðar skattahækkanir. Bjarni Benediktsson, formaður Sjálfstæðisflokksins, sagði meðal annars á Alþingi í gær: „Brjálæðið í þessum hugmyndum liggur í því að það er ekki hægt að stórauka álögur á atvinnustarfsemi og einstaklinga þegar við erum í þessari kreppu.“

Í DV í dag er greint frá því að fyrirhugaðar skattahækkanir ríkisstjórnarflokkanna munu kosta hvern einstakling á vinnumarkaði um 5.700 krónur á mánuði. Er þá miðað við meðallaun starfsfólks í fullu starfi út frá launum á almennum markaði árið 2008. Ef reiknað er út frá þeim sem eru bæði í fullri vinnu og hlutastörfum nemur hækkunin 136 krónum á mánuði.

Skattabreytingarnar koma verst niður á þeim sem hafa í kringum 750 þúsund krónur í laun á mánuði. Hjá þeim hækkar skatthlutfallið um 11,5 prósent. Hins vegar lækkar skatthlutfallið um 5,4 prósent hjá þeim sem hafa minna en 250 þúsund krónur í laun á mánuði.