Þriggja ára gamall strákur frá Rialto í Kaliforníu liggur þungt haldinn á sjúkrahúsi eftir að hafa skotið sjálfan sig í andlitið með skammbyssu á heimili ömmu sinnar.

Lögreglan í Rialto segir í samtali við Fox-fréttastofuna að amman hafi forræði yfir drengnum, en rannsóknarmenn reyna nú að komast að því hvernig drengurinn komst yfir skammbyssuna. Talið er fullvíst að um slysaskot hafi verið að ræða.

Lögreglan segir byssukúluna hafa farið inn um nösina á drengnum. Hann gekkst undir klukkustundarlanga skurðaðgerð en liggur, sem áður segir, þungt haldinn í lífshættu á sjúkrahúsinu.