Lögreglan í Cleveland í Bandaríkjunum hefur handtekið kynferðisglæpamanninn Anthony Sowell en hann var eftirlýstur eftir að lögreglan fann sex lík í og við heimili hans í síðustu viku. Sowell var handtekinn á gangi um götur Cleveland í gær en hann var eftirlýstasti maður Ohio-ríkis í nokkrar klukkustundir.

Forsaga málsins er sú að lögreglan í Cleveland var kölluð að heimili Sowells á fimmtudaginn eftir að tilkynning barst um að þar hefði verið framin nauðgun og líkamsárás. Þegar lögreglan fór að kanna heimili hans nánar fundust tvö illa rotnuð lík á þriðju hæð hússins. Þriðja líkið fannst síðan í kjallara hússins á föstudaginn og jarðneskar leifar þriggja annarra fundust svo í og við hús hans síðar sama dag.