„Það liggur fyrir að þar féllu orð sem eru meiðyrði að mínu viti,“ sagði Jón Magnússon hæstaréttarlögmaður og fyrrverandi þingmaður, um þátt Egils Helgasonar á Ríkissjónvarpinu, Silfur Egils, í þættinum Á Sprengisandi á Bylgjunni í morgun en Jón sagði ummæli í garð sonar hans og Davíðs Oddssonar í Silfri Egils jaðra við meiðyrði en sonur Jóns er Jónas Fr. Jónsson, fyrrverandi forstjóri Fjármálaeftirlitsins.

Í þættinum var rætt við Jón og Pál Magnússon útvarpsstjóra um málefni Ríkisútvarpsins.

Jón gagnrýndi Ríkisútvarpið fyrir að skera sig ekki úr hvað varðar fréttaflutning. „Ég tel að Ríkissjónvarpið sé beinlínis hlutdrægt og þá tek ég til dæmis Egil Helgason sem hefur gengið gjörsamlega út fyrir allt velsæmi aftur og aftur,“ sagði Jón og taldi að menn sem Egill hefði lagt í einelti að hans mati hafa engan kost á að svara fyrir sig.