Rannsókn lögreglunnar á Suðurnesjum beinist enn að öllum þeim einstaklingum sem setið hafa í gæsluvarðhaldi, þrátt fyrir að tveimur þeirra, báðir Íslendingar, hafi verið sleppt úr haldi. Rannsókn er í fullum gangi að sögn lögreglunnar og þaðan fást þau svör að ekki sé útilokað að gefin verði út ákæra á hendur öllum hinum grunuðu.

„Þó að við höfum ekki talið ástæðu til að halda öllum áfram þá er ekki þar með sagt að rannsókninni sé lokið gagnvart þeim. Við útilokum ekkert í rannsókninni eða þegar kemur að ákærum,“ segir Jóhannes Jensson, aðstoðaryfirlögregluþjónn lögreglunnar á Suðurnesjum.

Gæsluvarðhald yfir þeim sexmenningum sem enn eru í haldi, fimm Litháum og einum Íslendingi, rennur út fjórða nóvember.