Jóhannes Jensson, aðstoðaryfirlögregluþjónn lögreglunnar á Suðurnesjum, telur líklegt að krafist verði áframhaldandi gæsluvarðhalds sjömenninganna. „Við vinnum hörðum höndum og komið er að uppgjörsdegi hjá okkur. Ég vænti þess að við krefjumst framlengingar gagnvart flestum, ef ekki öllum, þeim sem sitja í gæsluvarðhaldi. Mér finnst það líklegt,“ segir Jóhannes Jensson.
Lögreglan á Suðurnesjum telur sig hafa ýmislegt í höndunum og segir flesta þætti rannsóknarinnar farna að skýrast. „Okkur hefur orðið ágengt í rannsókninni á mansali gagnvart þeim sem sitja í gæsluvarðhaldi þó svo tengslin séu mismunandi. Við teljum okkur hafa fast í hendi gagnvart þessum sakborningum,“ segir Jóhannes.
„Við erum með þolanda mansals og síðan hafa komið fram þolendur úr öðrum málum. Við gefum ekkert upp um ungu stúlkuna en hún er að jafna sig jafnt og þétt. Við reynum að vernda hana eins og hægt er.“
Gæsluvarðhald sjömenninganna, fimm Litháa og tveggja Íslendinga, rennur út klukkan 16 í dag.