„Hún hefur lagast. Hlutirnir hafa smám saman verið að skýrast og það eru meiri líkur en minni að hlutirnir gangi upp,“ sagði Vilhjálmur Egilsson, framkvæmdastjóri Samtaka atvinnulífsins, í Kastljósinu í kvöld aðspurður hvernig viðræður ganga á milli Samtaka atvinnulífsins og Alþýðusambandsins um staðfestingu á kjarasamningum.

Ekki er búist við að málin skýrist fyrr en undir miðnætti hvort Samtök atvinnulífsins segja upp kjarasamningi við Alþýðusambandið en þá rennur uppsagnarfresturinn út. Gylfi Arnbjörnsson, formaður Alþýðusambandsins, sagði í Kastljósinu að mikilvægast væri fyrir Alþýðusambandið að verja stöðu þeirra tekjulægstu og verja skattleysismörkin. Hann sagði atburðarrásina vera mun skárri núna en hún var fyrr í dag.