Ungur piltur fór á rúntinn um helgina með glænýtt ökuskírteini í vasanum. Sá var staðinn að hraðakstri í Ártúnsbrekkunni en bíll hans mældist á 128 km hraða. Auk sektarinnar fer pilturinn í akstursbann og verður gert að setjast aftur á skólabekk til að læra upp á nýtt hvernig á að aka bíl.

Annars voru nokkrir tugir ökumanna teknir fyrir hraðakstur á höfuðborgarsvæðinu um helgina en lögreglan var víða við hraðamælingar. Í grófustu brotunum var ekið á 40-50 km hraða umfram leyfilegan hámarkshraða og ljóst að pyngja margra mun léttast verulega vegna þessa.