Um mánaðarmótin mun Lyst ehf. hætta samstarfi við McDonalds skyndibitakeðjuna en fyrirtækið hefur rekið þrjá veitingastaði undir sérleyfi frá bandaríska risanum undanfarin ár. Rekstri staðanna verður haldið áfram undir nafninu Metro sem mun bjóða svipaðar vörur og áþekkan matseðil þar sem þó verður lögð áhersla á íslenskt hráefni. Breytingin mun vera gerð í góðu samkomulagi við McDonalds.

Í tilkynningu frá félaginu segir að ástæðan sé fyrst og fremst erfitt efnahagsumhverfi hér á landi og hrun gengis íslensku krónunnar ráði þar mestu. Undanfarin ári hefur Lyst ehf. keypt flest hráefni í McDonalds réttina, kjöt, ost, grænmeti og önnur aðföng af erlendum birgjum samkvæmt kröfum og stöðlum keðjunnar. Hráefniskostnaður fyrirtæksins hefur hins vegar tvöfaldast sökum gengishrunsins og gert afkomuna erfiða.

Er ekki trú á að efnahagsaðstæður hér batni nægilega til að rekstur veitingastaða undir merkjum McDonalds verði arðbær til lengri tíma.

Veitingastaðirnir þrír, á Suðurlandsbraut, í Kringlunni og á Smáratorgi munu halda áfram undir hinu nýja nafni. Fram kemur í tilkynningunni að 10-15 störf verði til hjá innlendum framleiðendum vegna breytinganna en nautakjöt, kjúklingur, mjólkurvörur, sósur, brauð og grænmeti meðal annars verði allt frá innlendum framleiðendum.

Að lokum er bent á að viðskiptavinir Metro muni frá og með 1. nóvember geta gengið að svipuðum matseðli og verið hefur hjá McDonalds.