Litháíska konan sem talið er að flutt hafi verið til landsins til að selja í vændi nýtur verndar og stuðnings á meðan mál hennar er rannsakað frekar. „Hún er í góðu yfirlæti og dvelur í húsnæði á vegum hins opinbera,“ segir lögreglufulltrúi hjá lögreglunni á Suðurnesjum.

Vika er síðan hún kom til landsins en lögreglan hefur nú fundið út að skilríki hennar voru fölsuð. Litháarnir þrír sem taldir eru tengjast ætluðu mansali eru enn í gæsluvarðhaldi og verða þar til á miðvikudag.

Konan hefur gefið lögreglu upp nafn og persónuupplýsingar sem unnið er að því að fá staðfestar frá litháískum yfirvöldum.