Unnur Birna Vilhjálmsdóttir segir móður sína, Unni Steinsson, hafa reynt að vara sig við því hvað það gæti haft í för með sér að vera fegurðardrottning. Hún hafi aðeins nýlega skilið varnaðarorð móður sinnar eftir að hafa upplifað margt á undanförnum árum. Hún segir það hafa verið sárt þegar einkalíf hennar var undir smásjá fjölmiðla og að það hafi verið lærdómsrík reynsla. Þetta er meðal þess sem kemur fram í einlægu viðtali við Unni Birnu í helgarblaði DV.

„Hún reyndi að vara mig við hvað það myndi þýða ef ég mér myndi ganga vel í þessum keppnum en ég er í raun ekki að átta mig á því fyrr en núna hvað hún átti við,“ segir Unnur Birna sem er ein vinsælasta fegurðardrottning Íslands fyrr og síðar, mastersnemi í lögfræði og leikkona.

Unnur hefur verið mikið í sviðsljósinu frá því að hún sigraði keppnina Ungfrú Ísland árið 2005 og var svo krýnd Ungfrú heimur í desember sama ár. Sviðsljósið hefur einnig skinið skært á einkalíf Unnar sem reyndi mikið á hana á sínum tíma. Hún segist reynslunni ríkari og ætlar framvegis að halda ástarlífinu út af fyrir sig.

Unnur er á fljúgandi siglingu í mastersnámi í lögfræði við Háskólann í Reykjavík og hefur mestan áhuga á því sem viðkemur alþjóðlegri lögfræði. Hún er ein af aðalleikurunum í nýjustu mynd Ladda sem hún segir hafa verið súrealískt að vinna með eftir að hafa verið aðdáandi hans frá unga aldri.