„Þetta mál er nú í höndum forseta Íslands,“ sagði Geir H. Haarde eftir fund sinn með Ólafi Ragnari Grímssyni, forseta Íslands.

Geir útilokaði ekki að rjúfa þing en telur það þó óheppilegt og fór hann því ekki fram á þingrof á fundinum með Ólafi Ragnari sem var að ljúka rétt í þessu.

Geir tók einnig fram að Sjálfstæðisflokkurinn væri ennþá í forystu ríkisstjórnarinnar og að flokkurinn hefði boðið fram krafta sína í þjóðstjórn.

Forystumenn hinna stjórnmálaflokkanna eru nú væntanlegir á fund Ólafs Ragnars. Þeir munu þá líklega segja honum hvort einhverjar viðræður séu þegar í gangi um stjórnarmyndun.