Reykvískir ráðamenn eru afar ósáttir við Vegagerðina þessa dagana. Ástæðan er sú að stjórnendur Vegagerðarinnar tilkynntu rétt fyrir jól breytingu á verðskrá þjóðvega. Fulltrúar í framkvæmda- og eignaráði Reykjavíkurborgar segja þetta þýða að kostnaður færist frá ríkinu yfir á sveitarfélögin í landinu.

Sighvatur Arnarsson, skrifstofustjóri gatna- og eignaumsýslu framkvæmda- og eignasviðs borgarinnar, gerði grein fyrir áhrifum þessarar breytingar á borgarsjóð á fundi í dag. Þar sagði hann að þarna gæti verið um að ræða tugi milljóna króna í aukinn kostnað árlega hjá Reykjavíkurborg. Hins vegar fylgja engir tekjustofnar með þessari breytingu.