„Það er alveg ljóst að forseti getur ekki sett nein formleg skilyrði,“ segir Geir H. Haarde, formaður Sjálfstæðisflokksins og fráfarandi forsætisráðherra, um þá yfirlýsingu Ólafs Ragnars Grímssonar forseta að hann myndi leggja áherslu á fjögur atriði í viðræðum sínum við formenn stjórnmálaflokkanna.

Geir er í viðtali í þættinum Ísland í dag á Stöð 2. Þar sagði hann að forsetinn gæti ekki sett nein skilyrði fyrir því hvernig næsta ríkisstjórn myndi starfa að hvað formenn stjórnmálaflokkanna hefðu til hliðsjónar við myndun ríkisstjórnar. Hann gaf líka lítið fyrir þau orð forseta að það væri forsetinn en ekki forsætisráðherra sem hefði þingrofsvaldið. Ólafur Ragnar Grímsson sagði á Bessastöðum í dag að forsætisráðherra gæti gert tillögu um að þing væri rofið en að það væri á endanum á valdi forseta hvort af því yrði eða ekki.