Það er allt útlit fyrir að Mamma Mia sé að komast á toppinn yfir mest sóttu bíómyndir allra tíma á Íslandi. Nú þegar hafa níutíu þúsund manns séð myndina og munu að öllum líkindum þúsund manns bætast við á sunnudaginn þegar fimmta söngsýningin á myndinni fer fram í stóra sal Háskólabíós. Í upphafi var prófað að halda söngsýningu í litla salnum sem seldist þrisvar sinnum upp og því var fjórða sýningin haldin í stóra salnum síðastliðinn föstudag og var vægast sagt troðið út úr dyrum og stemningin góð. Hægt er að tryggja sér miða á midi.is en ef ekki selst upp í forsölu verður hægt að kaupa sig inn við innganginn. Hingað til hefur þó verið uppselt þrem dögum fyrir sýningar svo mælt er með því að tryggja sér miðann tímanlega.