„Almenna reglan er sú að þeim mun meira félagslegt samneyti sem við höfum, þeim mun meiri líkur eru á að við smitumst,“ segir Björn Hjálmarsson barnalæknir um flensuna alræmdu sem einkennir hvert einasta haust. „Fyrir mína parta kann ég engin ráð til að forðast smitið. Nema bara loka sig af.“ Björn bendir hins vegar réttilega á að það er flestum allsendis ómögulegt.

Eina ráðið sem Björn hefur er að reyna að fyrirbyggja veikindin með því að halda ónæmiskerfinu í sem bestu ásigkomulagi. Fólk sem ofgerir sér í vinnu og þjáist af streitu er með þeim líklegri til að leggjast í flensuna þegar hún gengur yfir landann.

Björn tekur fram að það sé munur á því að taka smit og verða veikur. Frá fæðingu og til tvítugs tekur fólk að meðaltali eitt smit í viku. Sjaldnast verður fólk hins vegar veikt af smitinu, hverrar tegundar sem það er. Oftast vinnur ónæmiskefið verk sitt því án þess að tekið sé eftir.

Handþvottur er einnig mikilvægur því umgangspestir smitast gjarnan með snertingu. Björn hvetur fólk því til að sinna hreinlætinu sem best og þvo sér oft um hendurnar. Eftir stendur að samkvæmt læknisráði er heillavænlegast að gæta vel að almennri heilsu. Þeir sem taka smit verða þá síður veikir og þeir sem verða veikir fá vægari pest. Lestu um hvernig mögulega megi fyrirbyggja flensuna á neytendasíðu DV í dag.