Stjórnvöld í Afganistan hafa samþykkt tillögu Bandaríkjanna um þríhliða rannsókn á falli óbreyttra borgara í loftárásum í Herat-héraði í síðasta mánuði. Þetta kom fram í yfirlýsingu frá utanríkisráðuneyti Afganistan í gær.

Bandaríkjaher hefur dregið í efa fullyrðingar afgönskra stjórnvalda um að níutíu og sex óbreyttir borgarar hafi fallið í árásinni, sem vakti upp mikla reiði í landinu. Sameinuðu þjóðirnar hafa tekið undir fullyrðingar afganskra stjórnvalda.

Að sögn talsmanns utanríkisráðuneytisins hefur ríkisstjórnin samþykkt að taka þátt í rannsókninni ásamt fulltrúum alþjóðaliðsins í Afganistan og Sameinuðu þjóðunum.