„Það skellur bara á verkfall á miðnætt, það er ekkert öðruvísi, því miður,“ segir Bára Hildur Jóhannsdóttir, formaður kjaranefndar Ljósmæðrafélags Íslands um fyrirhugaðar verkfallsaðgerðir ljósmæðra.

„Næsti samningafundur er boðaður klukkan 10 á morgun tíu tímum eftir að verkfall skellur á,“ segir Bára og bætir þó við að jafnvel þótt talsverð lömun verði á störfum þeirra verður tryggð neyðarþjónusta við fæðandi konur.

„Það sem skerðist er Hreiðrið á Landspítalanum og meðgöngudeild. Mæðravernd er úti að mestu leyti. Fósturgreiningadeild sinnir bráðatilvikum þannig að það fylgir þessu mikil lömun. Á suðurlandi verða eingöngu morgunvaktir þannig að það verður ekki boðið upp á fæðingar á kvöld- og næturvöktum. Við erum náttúrulega að vinna eftir þrettán ára gömlum undanþágulistum, þannig hljóma þeir,“ segir Bára Hildur um ástandið sem skapast hefur í kringum kjarabaráttu ljósmæðra.

Færri ljósmæður komust að en vildu á þingpöllum Alþingis í dag þar sem þær hugðust fylgjast með fyrirspurnartíma þar sem verkfallið var meðal annars rætt. Bára segir ljósmæður afar svekktar með lýðræðið í verki hvað þetta varðaði. Hvað umræðurnar á Alþingi varðaði sagði Bára að ljósmæður hafi verið ánægðar með erindi Katrínar Jakobsdóttur, þingmanns Vinstri grænna, sem og fyrirspurnar Ellerts B. Schram. Hún segir að Ljósmæðrafélagið finni fyrir miklum stuðningi í samfélaginu og að þær muni berjast ótrauðar fyrir sínu. „Þetta er hörmuleg staða, við erum ekki bjartsýnar og snýst um að berjast gegn framtíðarvanda. Við lifum ekki bara á stoltinu eins og starfið er nú dásamlegt af öllu öðru leyti,“ segir Bára Hildur Jóhannsdóttir að lokum.