Maðurinn sem fannst látinn í íbúð sinni á Skúlagötu í fyrrakvöld lést af völdum höfuðáverka. Þetta staðfestir Friðrik Björgvinsson, yfirlögregluþjónn í rannsóknardeild. Tveir menn voru í gær úrskurðaðir í gæsluvarðhald til áttunda september grunaðir um aðild að andláti hans. Friðrik segir að nú verði farið í að rannsaka hvernig maðurinn fékk áverkanna.

Það var um kvöldmatarleytið í fyrrakvöld sem maðurinn fannst í íbúð sinni látinn. Félagi mannsins sem ekki hafði séð hann í nokkra daga hafði samband við lögreglu og ákvað lögregla að grennslast frekar fyrir um manninn. Hann fannst skömmu síðar látinn í íbúð sinni.

Þessi sami félagi mannsins var handtekinn í kjölfarið en ekki reyndist unnt að yfirheyra hann strax þar sem hann var í annarlegu ástandi. Samkvæmt heimildum DV er hinn maðurinn, sem var handtekinn, grunaður um að hafa verið hjá manninum skömmu áður en hann lést. Mennirnir tveir sem eru í haldi lögreglu eru á fimmtugs- og sextugsaldri.