„Við erum í sambandi við kínversk yfirvöld varðandi málið og vonum að það verði engar tafir á hans málum,“ segir Urður Gunnarsdóttir fjölmiðlafulltrúi Utanríkisráðuneytisins varðandi mál íslendingsins sem hnepptur var í varðhald í borginni Guangzhou í Kína á dögunum.

Hún segir Utanríkisráðuneytið vera að beita sér fyrir því að honum verði sleppt úr haldi á allra næstu dögum. „Ég get ekki tjáð mig meira um þetta mál,“ segir Urður þegar blaðamaður spyr hana um það hvað felist nákvæmlega í þeim viðræðum sem eiga sér stað. Hún segir engin tvö mál vera eins en Utanríkisráðuneytið beiti sér ávallt fyrir því að veita hverjum þeim íslendingi sem lendir í vanda erlendis aðstoð.