Nígeríumaðurinn Mohammadu Bello Abubakar þarf að skilja við áttatíu og tvær af áttatíu og sex eiginkonum sínum. Íslamskur dómstóll hefur ákveðið að Abubakar verði að láta sér nægja fjórar eiginkonur.

Mohammadu Bello Abubakar, sem er áttatíu og fjögurra ára, hefur fengið tveggja daga frest til að vísa konunum á dyr, en það er alls ekki með glöðu geði sem hann mun framfylgja því.

Með eiginkonunum hefur Abubakar eignast ekki færri en eitthundrað og sjötíu börn og sumum kvennanna hefur hann verið kvæntur í þrjátíu ár. Ef Mohammadu Bello Abubakar hlítir ekki úrskurðinum á hann yfir höfði sér líflátsdóm, segir á vefsíðu BBC.