Verið er að ganga frá nýju gjaldeyrisláni að upphæð rúmlega 30 milljarða króna. Þetta sagði Geir H. Haarde forsætisráðherra á Alþingi í dag. Jafnframt sagði Geir að kjör lánsins væru mun hagstæðari en hið svokallaða skuldatryggingaálag á ríkissjóð gæfi til kynna.

Geir flutti skýrslu um efnahagsmál fyrr í dag. Geir sagði að gjaldeyrisforðinn væri nú hlutfallslega mun meiri en í flestum nágrannalöndum ef miðað væri við landsframleiðslu. Þá sagði Geir að ríkisstjórnin hefði gert sitt til að tryggja stöðugleika í efnahagslífinu og fjárlagafrumvarpið í október og stefnuræða hans muni bera þess merki.