Fjölskylduhjálpin hefur aðstoðað fátæka undanfarin fimm ár. Hún leigir húsnæði sitt af Reykjavíkurborg en hefur ekki getað staðið í skilum með leiguna. Skuldin er nú komin í innheimtu og Fjölskylduhjálpinni hótað útburði. Ásgerður Jóna Flosadóttir segist ítrekað hafa sótt um styrk til borgarinnar en alltaf verið hafnað.

„Þetta er árás á fátæka fólkið í borginni,“ segir Ásgerður Jóna Flosadóttir, formaður Fjölskylduhjálpar Íslands, sem verður lokað á næstunni.

Fjölskylduhjálpin hefur undanfarin fimm ár starfað í þágu fátækra og vikulega úthlutað matvælum til þeirra sem minnst mega sín. Hún leigir húsnæði sitt að Eskihlíð 2 til 4 af Reykjavíkurborg en hefur ekki getað staðið í skilum með leiguna frá nóvember 2006. Því er svo komið að Reykjavíkurborg hótar góðgerðarfélaginu útburði.