Einum manni er nú haldið sofandi í öndunarvél eftir harðan árekstur tveggja bíla og rútu á Suðurlandsvegi í morgun. Læknir segir manninn vera þungt haldinn. Hinir tveir sem fluttir voru á sjúkrahús eru minna slasaðir.

Tildrög slyssins voru þau að ökumaður jeppa hugðist beygja til vinstri inn á Kirkjuferjuveg á milli Selfoss og Hveragerðis. Aftan á hann ók lítil sendibifreið með þeim afleiðingum að jeppinn skall framan á rútu sem kom úr gagnstæðri átt. Báðir ökumenn bílanna slösuðust, ásamt einum farþega í rútunni.