„Þetta er hræðilegt, alveg hræðilegt. Þessi glæpamaður hefur rifið líf mitt og sál frá mér með þessum glæp,“ segir Jun Morikawa, nemandi í stjórnmálafræði við Háskóla Íslands, sem varð fyrir því á dögunum að brotist var inn í bifreið hans á lóð Háskóla Íslands og fartölvu hans stolið. Fartölvan inniheldur 150 blaðsíðna mastersritgerð hans.

Jun Morikawa, sem er frá Japan og hefur búið hérlendis í 7 ár, hafði lagt bifreið sinni fyrir utan Odda þann 18. júlí síðastliðinn um níuleytið að kvöldi til.

„Þegar ég hafði lokið erindum mínum í Odda snéri ég aftur út í bíl og mér til mikillar skelfingar sá ég að búið var að brjótast inn í bílinn minn og stela ferðatölvunni minni, sem inniheldur mastersriterðina mína og margar aðrar persónulegar upplýsingar sem eru mér ómetanlegar,“ segir Jun í samtali við dv.is.

Um er að ræða 150 blaðsíðna mastersritgerð sem Jun á að skila þann 5. september næstkomandi, en nú hefur óprúttinn innbrotsþjófur stefnt öllu í voða.

Örvæntingafullur
„Ég er þessa dagana að reyna að semja við leiðbeinanda minn hjá Háskólanum vegna málsins,“ segir Jun, sem jafnframt hefur tilkynnt málið til lögreglu. Hann hefur ekkert heyrt frá þeim síðan þá og er farinn að efast um að fá tölvuna aftur í hendurnar.

Tölvan er tveggja ára gömul Toshiba Satelite með serial númerinu 17261931Q, og biðlar Jun til þeirra sem einhverjar upplýsingar geti veitt um þetta atvik, eða til þess einstaklings sem hugsanlega hefur tölvuna undir höndum að stíga fram og skila henni.

„Ég lofa veglegum fundarlaunum hverjum þeim sem getur komið með gagnlegar upplýsingar sem leiða til þess að ég fái tölvuna aftur upp í hendurnar,“ segir Jun Morikawa, sem segist sakna tölvunnar, ritgerðarinnar og sinna persónulegu upplýsinga sárt.

Vonar að þjófurinn skili tölvunni
Fyrr í vikunni greindi DV frá sambærilegu atviki þegar Ragnar P. Steinsson, tónlistarmaður, varð fyrir því að fartölvu hans var stolið af heimili hans. Á tölvunni voru ómetanlegar myndir af dóttur hans og myndband af fæðingu hennar. Í DV í dag er greint frá því að tölvunni hafi verið skilað til Ragnars og vonar Jun Morikawa að þjófurinn sem tók tölvuna sína sjá einnig að sér.

Hver sá sem getur veitt upplýsingar um fartölvu Jun er beðinn að hafa samband við lögregluna í síma 444-1000.