„Þetta mál snertir mig ekki persónulega á nokkurn hátt heldur byggist niðurstaða ráðuneytisins á hlutlægu mati þess á lögheimildum lögreglustjóra við umsögn í tilvikum sem þessum,“ segir Björn Bjarnason dómsmálaráðherra aðspurður um þau orð Svandísar Svavarsdóttur að hann hafi þvingað lögreglustjórann á höfuðborgarsvæðinu til að breyta afstöðu sinni gagnvart leyfisveitingu til Goldfinger.

Borgarstjórnarflokkur Vinstri grænna vill meina að lögreglustjóri hafi verið þvingaður til að breyta afstöðu sinni, og nefndi Svandís í samtali við dv.is í dag, Björn Bjarnason dómsmálaráðherra í því samhengi. Hún spurði jafnframt hverjir hagsmunir dómsmálaráðherra væru í þessu máli.

Björn segir þessu til viðbótar að það sé sýslumanns í Kópavogi að taka ákvörðun í þessu máli en ekki ráðuneytis né lögreglustjórans á höfuðborgarsvæðinu.

Sjá einnig:
Spyr hverjir hagsmunir ráðherra séu