Íslenskir námsmenn sem sækja nám erlendis hafa lakari réttarstöðu þegar kemur að fæðingarstyrk frá íslenska ríkinu en nemendur við íslenska skóla. Harpa Hrönn Stefánsdóttir sér ekki fram á að geta haldið áfram námi í haust vegna fjárskorts. Hún fékk full námslán frá LÍN fyrir síðasta skólaár en telst ekki hafa verið í nógu miklu námi til að fá fæðingarstyrk. Henni finnst íslensk yfirvöld bregðast námsmönnum.

 „Ég get ekki betur séð en það sé búið að dæma mig úr námi,“ segir Harpa Hrönn Stefánsdóttir. Hún er í námi erlendis og fékk full námslán frá Lánasjóði íslenskra námsmanna fyrir síðustu tvær annir. Harpa býr í Danmörku ásamt fjögurra mánaða syni sínum en samkvæmt reglugerð um úthlutun fæðingarstyrks fær hún þó engan slíkan styrk þar sem mat Fæðingarorlofssjóðs er að hún hafi ekki verið í nægjanlega miklu námi. Þar sem hún er með lögheimili erlendis fær hún heldur ekki fæðingarstyrk sem móðir utan vinnumarkaðar.

Nýbökuð móðir stórskuldug

Harpa og maðurinn hennar sem einnig er í námi þurfa nú að sjá fyrir heilli fjölskyldu með námslánum mannsins. Hún lauk BA-gráðu frá Háskóla Íslands og hefur tekið eitt ár í meistaranámi við svissneskan háskóla. Harpa ætlaði að hefja nám á ný í haust við danskan háskóla og ljúka meistaragráðunni. Hún sér þó ekki fram á að geta það vegna fjárskorts. Maðurinn hennar er einnig í meistaranámi. „Ef allt fer á versta veg þarf hann líka að hætta í skóla,“ segir hún og sér fram á að vera orðin stórskuldug áður en sonur þeirra verður ársgamall. Til að láta enda ná saman er hún með yfirdráttarlán hjá íslenskum banka með tilheyrandi vöxtum.

Undrandi á Fæðingarorlofssjóði

Skýringin á synjun styrksins er sú að á haustönn 2007, ári áður en sonurinn fæddist, var Harpa aðeins í 63 prósenta námi. Á vorönn 2007 var hún þó í yfir 100 prósenta námi.

Alls telst hún hafa verið í um 83 prósenta námi á skólaárinu og bjóst hún ekki við öðru en að fá styrkinn. Í reglum um úthlutun segir hins vegar að nemandi þurfi að vera í 75 til 100 prósenta námi samfellt í sex mánuði eða lengur á síðustu tólf mánuðum fyrir fæðingu barnsins. Vorönnin var aðeins fimm mánuðir og því var umsókninni synjað. Úrskurðarnefnd fæðingar- og foreldraorlofsmála staðfesti synjunina.
Harpa er undrandi á þessu fyrirkomulagi og fyndist eðlilegra að Fæðingarorlofssjóður tæki LÍN sér til fyrirmyndar hvað varðar mat á námsframvindu enda teljist hann sú stofnun sem beinlínis starfar við það. Harpa gagnrýnir að yfirvöld virðist svo upptekin af því að tryggja að ekki sé svindlað á kerfinu að þeir sem kerfið á að hjálpa líði fyrir það.


DV fjallar ítarlega um málið í dag.