Maður fannst látinn á heimili sínu í Gaukshólum í síðustu viku. Síðast sást til mannsins í Bónus í ágúst. Aðkoman var skelfileg en maðurinn var einstæðingur. Formaður húsfélagsins, Tryggvi Agnarsson, segir málið fyrst og fremst sorglegt. Lærdómurinn sem þarf að draga af þessu atviki sé að fólk verði að vera vakandi yfir nágrönnum sínum.

„Það sást síðast til hans í ágúst þegar hann var í Bónus,“ segir Tryggvi Agnarsson, formaður húsfélags í Gaukshólum, en maður á sextugsaldri fannst látinn í íbúð sinni eftir að hafa verið þar í margar vikur, jafnvel mánuði. Þegar haft var samband við lögregluna á höfuðborgarsvæðinu fengust þau svör að erfitt væri að tímasetja ákveðinn dánartíma. Þó væri ljóst að maðurinn hafi verið látinn í íbúð sinni í ekki minna en mánuð.

Aðkoman var hryllileg en tilkynning barst til lögreglunnar frá nágranna mannsins. Lyktin frá íbúðinni var orðin megn eftir að maðurinn hafði legið þar látinn vikum saman.