„Við getum ekki svarað því eins og stendur en það er verið að fara yfir gögnin og jarðeðlisfræðingar liggja yfir þessu og við bíðum eftir niðurstöðu frá þeim,“ segir Hjörtur Árnason hjá Veðurstofunni aðspurður hvort eftirskjálfta sé að vænta. Klukkan 14:17 í dag mældist jarðskjálfti upp á 3,7 af stærð tíu til tólf kílómetra norður af Þorlákshöfn. Jarðskjálfti var klukkan 14:17 tíu til tólf kílómetra norður af Þorlákshöfn.

Hjörtur segir að um það bil einn svona skjálfti mælist á mánuði og er mjög eðlilegt að fólkið hafi fundið dynk á Þorlákshöfn og þar í kring.

Kristín Þrastardóttir, starfsmaður í Skálanum, sjoppu í Þorlákshöfn, segir að hún hafi fundið vel fyrir skjálftanum. „Já við fundum sko fyrir honum og okkur brá rosalega mikið. Við fundum svona tvö högg í nokkrar sekúndur,“ segir Kristín en ekkert færðist úr hillum eða annað slíkt.