„Ég var að boða til hertari aðgerða, fleiri aðgerða, það er það sem við vorum að gera,“ segir Hörður Torfason mótmælandi. Aðspurður um hvernig aðgerðir það eru segir Hörður: „Við ætlum að upplýsa það með svona klukkutíma fyrirvara í fjölmiðla. Núna erum við komin með aðstöðu svo þetta er allt að breytast, það má gera ráð fyrir spennandi tímum í vikunni. Strax á mánudag munum við hefjast handa og fara undirbúa aðgerðir, við ætlum að fá ráðamenn til að bregðast við.“

Hörður segir að ekki sé eggjakast og annað slíkt í undirbúningi. „Þetta eru friðsamleg mótmæli, ég stend aldrei fyrir svona eggjakasti og slíku. Ég hef verið í þessu í 33 ár og ég nota heilann, rök og festu.“

Í kringum þúsund manns komu á Austurvöll klukkan þrjú í dag að mótmæla að sögn lögreglunnar á höfuðborgarsvæðinu. Mótmælin fóru friðsamlega fram og ekki nein eggjaköst eða slíkt eins hefur verið síðustu laugardaga. Lögreglan var í viðbragðsstöðu á meðan mótmælin stóðu yfir eins og venja er til, að sögn lögreglumanns.

Gerður Kristný rithöfundur og Jón Heiðar Erlendsson ávörpuðu fundinn með ræðum. Yfirskrift fundarins í dag var „Breiðfylking gegn ástandinu“ og hélt Hörður Torfason stutta ræðu þegar Gerður og Jón voru búin að ljúka máli sínu.