Kristján B. Jónasson, formaður Félags íslenskra bókaútgefanda, telur æskilegt að bæta við flokki fyrir barnabækur innan Íslensku bókmenntaverðlaunanna í fyllingu tímans. Þetta kemur fram í pistli sem Kristján skrifar á bloggsíðu sína í gær þar sem hann furðar sig á viðbrögðum fólks við tilnefningunum til verðlaunanna sem kunngjörð voru í vikunni.

„Man einhver til þess að tilnefningar til Edduverðlauna veki blaðadeilur? Ráðast leiklistargagnrýnendur að Grímuverðlaununum og heimta að þau verði ýmist lögð niður, að þau verði algerlega stokkuð upp eða kalli þau „samkvæmisleik“?“ spyr Kristján og svarar svo fyrir sína parta að hann minnist þess ekki.