Laun Geirs H. Haarde, forsætisráðherra, lækka um tæp 15 prósent um áramótin samkvæmt úrskurði Kjararáðs í morgun. Laun þingmanna lækka um tæplega 7,5 prósent. Geir H. Haarde fer úr 1100 þúsund krónum í 935 krónur á mánuði og aðrir þingmenn fara í 855 þúsund krónur. Þetta kom fram í hádegisfréttum hjá RÚV í dag.

Í lok nóvember beindi forsætisráðherra þeim tilmælum til kjararáðs um að lækka laun æðstu ráðamanna þjóðarinnar um 5-15 prósent. Ráðið hafnaði þeirri beiðni og sagðist ekki hafa lagaheimild til þess. Stjórnvöld settu lög á alþingi 20. desember þar sem kjararáði var falið að lækka laun skjólstæðinga sinna um áðurnefnd 5-15 prósent.

Kjararáð hefur hist nokkrum sinnum í kjölfarið, nú síðast í morgun. Laun Geirs eru því nú tæplega 1100 þúsund krónur á mánuði en eftir breytingu 935 þúsund krónur. Aðrir ráðherrar þurfa einnig að þola kjaraskerðingu um allt að 14 prósent. Þeir eru í dag með 990 þúsund krónur í laun á mánuði en eftir breytingu verða þau 855 þúsund krónur. Laun þingmanna lækka síðan um 7,5 prósent. Fara úr 560 þúsund krónum í 520 þúsund krónur.

Ekki var tekin ákvörðun um launalækkanir annarra ráðamanna, svo sem, dómara og forstjóra.