Tíu bækur voru tilnefndar til Íslensku bókmenntaverðlaunanna í kvöld, fimm í flokki fagurbókmennta og fimm í flokki fræðibóka og bóka almenns efnis.

Í fyrrnefnda flokknum voru tilnefndar Rán eftir Álfrúnu Gunnlaugsdóttur, Ofsi eftir Einar Kárason, Skaparinn eftir Guðrúnu Evu Mínervudóttur, Skuggamyndir úr ferðalagi eftir Óskar Árna Óskarsson og Rökkurbýsnir eftir Sjón.

Í flokki fræðibóka og bóka almenns efnis voru tilnefnd Hjörleifur Guttormsson fyrir Árbók Ferðafélags Íslands 2008, Ingunn Ásdísardóttir og Kristín Ragna Gunnarsdóttir fyrir Örlög guðanna, Loftur Guttormsson fyrir ritið Almenningsfræðsla á Íslandi 1880 til 2007, Vilhjálmur Árnason fyrir Farsælt líf, réttlátt samfélag. Kenningar í siðfræði, og Þorvaldur Kristinsson fyrir ævisögu Lárusar Pálssonar leikara.

Vinningshafar verða tilkynntir í lok janúar.