Yfirvöld í Norður-Kóreu sendu í gær út nýjar upptökur af einræðisherra landsins, Kim Jong-il. Á upptökunum, sem sýndar voru í fjölda ríkisrekinna fjölmiðla, mátti sjá einræðisherrann sprækan og heilbrigðið uppmálað, þar sem hann skoðar eina sveit flughers landsins.

Síðan Kim Jong-il var fjarverandi hersýningu í september hefur orðrómi um hrakandi heilsufar hans vaxið fiskur um hrygg, og spurningar um hver héldi um valdatauma Norður-Kóreu vaknað.
Útsendingu ríkisfjölmiðlanna fylgdu ekki upplýsingar um nákvæma dagsetningu upptökunnar.