Auður A. Ólafsdóttir og Sigurbjörg Þrastardóttir hafa verið tilnefndar til Bókmenntaverðlauna Norðurlandaráðs í ár, Auður fyrir skáldsöguna Afleggjarann og Sigurbjörg fyrir ljóðabókina Blysfarir. Báðar bækurnar komu út í fyrra. Tíu bækur eru tilnefndar til verðlaunanna á hverju ári, tvær frá hverju norrænu ríkjanna. Dómnefndin mun á fundi sínum 3. apríl á næsta ári kveða upp úr um það hver hlýtur Bókmenntaverðlaun Norðurlandaráðs árið 2009. Verðlaunaféð nemur 350 þúsund dönskum krónum. Þess má geta að Auður fékk Menningarverðlaun DV í bókmenntum fyrr á árinu fyrir Afleggjarann.