Nær óhugsandi er talið að sjávarútvegurinn ráði við 600 milljarða skuldir sínar, sem að miklum hluta eru í erlendri mynt. Samanlagðar skuldir greinarinnar voru áætlaðar 407 milljarðar króna við upphaf bankahrunsins þannig að hækkunin síðan þá skrifast að mestu á gríðarlegt fall krónunnar frá þeim tíma.

Ofan á þessar skuldir bætist 100 milljarða króna skuld vegna framvirkra gjaldeyrissamninga. Liðlega þrjátíu sjávarútvegsfyrirtæki í viðskiptum við Landsbankann hafa óskað eftir því að fá slíkar skuldir niðurfelldar, en þær eru fyrst og fremst til komnar vegna falls krónunnar. Heimildarmaður DV bendir á að ef gengishrun krónunnar megi að einhverju leyti rekja til aðgerða bankanna undanfarna mánuði sé efni til þess að líta svo á að þeir hafi tekið sér stöðu gegn viðskiptavinum með framvirka gjaldeyrissamninga.