Sorpmagn heimilanna var 18 prósent minna í nóvember 2008 borið saman við nóvember 2007 samkvæmt tilkynningu frá Reykjavíkurborg. Viðbúið er þó að vinnan þyngist hjá sorphirðufólki í desember þar sem sorpmagn er ævinlega mikið þar sem margt berst inn um lúguna.

„Mikilvægt að flokka sorp til endurvinnslu um jólahátíðirnar því mikið leggst til,“ segir Sigríður Ólafsdóttir rekstrarstjóri Sorphirðu Reykjavíkur. „Við munum vinna fram að hádegi á aðfangadag. Og byrjum aftur annan í jólum og stefnum að því að allir fái losun á sorpi á milli hátíða - aðeins veður og færð geta hindrað það,“ segir Sigríður.

Hún segir óhagstætt að fylla tunnurnar með jólapappír og pappakössum. „Þetta rusl lyktar ekki og afar auðvelt er að fara með það á endurvinnslustöðvar.“ Ferð í Sorpu eða í grenndargáma kemur í veg fyrir að sorpílát yfirfyllist eins og stundum vill við henda um jólin. Þá biður Sigríður fólk í tilkynningunni um að moka snjó frá sorpgeymslum og eyða hálku sem liggur að sorpílátum.