Héraðsdómur Reykjavíkur hefur dæmt fyrrverandi ritstjóra tímaritsins Hér og nú, til greiðslu 300 þúsund króna sektar, vegna áfengisauglýsingar sem birtist í blaðinu þann sextánda mars árið 2006.

Ritstjórinn fyrrverandi sagði fyrir dómi að hann hafi ekki séð umrædda auglýsingu fyrr en hann var kallaður í skýrslutöku hjá lögreglu. Þeir starfsmenn blaðsins sem séð hafi um að selja auglýsingar í blaðið hafi tekið ákvarðanir um allar auglýsingar í blaðinu.

Var það mat Héraðsdóms að sakfella bæri ritstjórann þar sem ekki liggur fyrir nafngreining á auglýsingunni. Ef ekki sé unnt að bera kennsl á höfundinn skuli aðrir bera ábyrgðina eftir tiltekinni ábyrgðaröð.

Var ritstjóranum fyrrverandi gert að greiða 300 þúsund króna sekt til ríkissjóðs innan fjögurra vikna frá uppkvaðningu dómsins, en sæta ella fangelsi í 22 daga. Þá var honum gert að greiða laun verjanda síns, 111 þúsund krónur.