„Það sem mér fannst eiginlega mest sláandi var hversu illa er búið að lögreglunni,“ segir Jón Kristinn Cortez sem varð fyrir því seinnipartinn á sunnudag að Galloper-jeppa hans var stolið fyrir utan Fríkirkjuna í Reykjavík.

Jón var þar að stjórna kór sem hélt tónleika við kirkjuna til styrktar björgunarsveitinni Kyndli frá Mosfellsbæ. Jón segist hafa fengið fremur undarleg svör hjá lögreglunni þegar hann tilkynnti um þjófnaðinn á sunnudaginn.

Ekki leitað að bílnum
„Í fyrsta lagi fannst mér einkennilegt að koma að læstum dyrum hjá lögreglunni í Reykjavík á sunnudegi. Síðan fékk ég þau svör að ekki yrði gerð formleg leit að bílnum. Til þess væri enginn mannskapur, en ef hann yrði stöðvaður við venjubundið eftirlit myndi það koma upp í tölvu lögreglunnar að hann væri eftirlýstur,“ segir Jón og viðurkennir að hann hafi nú ekki ætlað að halda niðri í sér andanum og bíða eftir því upp á von og óvon. Hann segist þó ekki áfellast lögregluna fyrir svörin, ábyrgðin liggi hjá stjórnvöldum sem greinilega sníði embættunum þröngan stakk.