Hæstiréttur Íslands hefur úrskurðað dóm Hérðasdóms Reykjavíkur yfir Jens R. Kane frá því 14. desember í fyrra ómerkan og vísað málinu aftur til héraðsdóms til aðalmeðferðar og dómsálagningar að nýju. Jens var fyrir héraðsdómi dæmdur í átta mánaða óskilorðsbundið fangelsi fyrir ofbeldi gegn fyrrverandi unnustu sinni, Veronicu Rincon frá Venesúela. Jens segir í samtali við DV vera ánægður með niðurstöðu Hæstaréttar en því væri enn ekki lokið. Hann heldur fram sakleysi sínu í málinu.

Meðal þess sem fram kemur í dómi Hæstaréttar í dag er að Rincon sem er spænskumælandi hafi gefið munnlega skýrslu á spænsku við aðalmeðferð málsins í héraði og var fenginn til starfa túlkur, sem ekki hafði hlotið löggildingu til að gegna því.Þá hafi eitt vitni, sem gaf skýrslu fyrir héraðsdóm, mætt á ný fyrir dóm og greint frá atriðum varðandi málið sem það var ekki innt eftir í fyrra skiptið. Telur Hæstiréttur ekki loku fyrir það skotið að þau atriði sem þar komu fram, geti haft áhrif á sönnunargildi framburðar Veronicu. Vegna þessa telur Hæstiréttur óhjákvæmilegt að ómerkja dóm Héraðsdóms Reykjavíkur og vísa því aftur til aðalmeðferðar og dómsálagningar á ný.

Átti sér engar málsbætur
Það var 14. desember í fyrra sem Héraðsdómur Reykjavíkur dæmdi Jens R. Kane í átta mánaða óskilorðsbundið fangelsi fyrir ofbeldi gegn fyrrverandi unnustu sinni. Ofbeldi sem átti sér stað 23.janúar í fyrra. Stúlkan, Veronicu Virginiu Sarcos Rincon frá Venesúela, sakaði Jens um að hafa slegið hana og sparkað í bakið á henni. Hún hafi þá flúið inn á baðherbergi og læst sig inni. Jens hafi þá sparkað upp baðherbergishurðinni, gripið um háls hennar með annarri hendi og haldið fyrir munn hennar með hinni. Rincon gat á þeim tímabundi ekki andað og greip til þess að bíta Jens í hendina. Eftir bitið mun Jens hafa tekið hana kverkataki með báðum höndum og slengt henni upp við vegg þannig að hún missti meðvitund. Verulega bar á milli frásögnum þeirra af atburðum næturinnar umræddu en héraðsdómur tók vitnisburð Jens ekki trúverðugan og sagði hann engar málsbætur eiga sér. Niðurstaða dómsins var að dæma hann í átta mánaða fangelsi og til að greiða Rincon 500 þúsund krónur í skaðabætur.
Jens undi dómnum illa á þeim tíma og sagði dóminn hafa keypt einhliða upplognar sakir á hann og dómnum yrði áfrýjað.