Erling Egilsson, betur þekktur sem Elli úr Steed Lord, tók það mikla verkefni að sér í fyrrakvöld að þeyta skífum á háklassastaðnum Bungalow 8. Elli, eins og hann er oftast kallaður, flutti til London í lok sumars, ásamt unnustu sinni, Sögu Sigurðardóttur ljósmyndara, sem leggur stund á nám í tískuljósmyndun.

Elli er einn tveggja söngvara rafsveitarinnar Steed Lord og er ekki þekktur fyrir plötusnúðaverkefni. Einhver breyting virðist vera að verða þar á en Bungalow 8 er einn flottasti og vinsælasti staðurinn í London og Los Angeles. Hollywood-stjörnurnar leita mikið þangað og þykir ekki ólíklegt að fína og fræga fólkið hafi lagt leið sína á Bungalow til að hlusta á Ella þeyta skífum langt fram eftir nóttu.