Sala á gjafakortum Þjóðleikhússins hefur tvöfaldast frá því á sama tíma í fyrra og hafa þegar selst tæplega fimm þúsund kort. Fjórða upplagið af gjafakortahulstrum fyrir Kardemommubæinn er væntanlegt úr prentun á allra næstu dögum en gjafakort á Kardemommubæinn rjúka út.

Almenn gjafakortasala er einnig með besta móti, auk þess sem mikil aðsókn er að sýningum Þjóðleikhússins. Í tilkynningu frá leikhúsinu segir að ljóst megi vera að leikhúsið, íslensk sköpun og menning sé þjóðinni ofarlega í huga nú um stundir.