Á sama tíma og sveitarfélög leita leiða til að skera niður í rekstri eru Grindvíkingar í sókn. Meirihlutinn í bæjarstjórn Grindavíkur ætlar, samkvæmt fjárhagsáætlun fyrir árið 2009, að eyða rúmum þremur milljónum í endurbyggingu á vefsíðu Grindavíkurbæjar. Málið varð tilefni til snarpra umræða á síðasta bæjarstjórnarfundi þar sem sjálfstæðismenn, sem eru í minnihluta, mótmæltu harðlega.

„Grindavíkurbær getur auðveldlega lifað við gömlu heimasíðuna eitthvað áfram, ekki þarf að eyða í hana nú fjármunum að upphæð 3.165.500 krónum án virðisaukaskatts.  Þetta er gert þó vitað sé að vinna við fjárhagsáætlun sé í fullum gangi og þurfi að minnka hallarekstur í samkomulagi við minnihluta,“ segir í bókun sjálfstæðismanna en þeir lögðu einnig fyrir á sama fundi að laun bæjarfulltrúa, nefndarmanna og bæjarstjóra verði lækkuð sem nemi fimmtán prósentum. Sú tillaga var felld með fjórum atkvæðum.

Fulltrúar B- og S-lista furðuðu sig á afstöðu sjálfstæðismanna og sögðu þá þröngsýna í þessu brýna máli: „Það er með ólíkindum hve þröngsýnir sjálfstæðismenn eru í þessu brýna máli.  Til að efla byggðina þarf að markaðssetja hana og efla alla kynningu Grindavíkurbæjar á heimasíðu bæjarins. Hún er lykill aðkomumanna að bænum og nauðsynlegur miðill líka fyrir heimamenn. 

Upplýsingar um atvinnulíf, ferðaþjónustu og alla þjónustuþætti sveitarfélagsins  þurfa að vera mun aðgengilegri en í dag. Það kom glögglega fram í fundarröð bæjarstjórnar með hagsmunaaðilum atvinnulífsins í Grindavík að heimasíðan skiptir mjög miklu máli í allri markaðssetningu á ferðatengdri þjónustu í bænum. Með góðri markaðssetningu er hægt að auka tekjur bæjarins og fjölbreytni tækifæra sem væntanlega  auka tekjur Grindavíkurbæjar.“