Kvikmyndasíðan Twitchfilm.com birti á dögunum myndir úr íslensku splatter-hryllingsmyndinni Reykjavik Whale Watching Massacre. Myndin fjallar um hóp af fólki í hvalaskoðunarferð sem er tekið upp í hvalveiðibát þegar hvalaskoðunarbáturinn þeirra bilar.

Myndin er framleidd af framleiðslufyrirtækinu Kisa sem er í eigu þeirra Ingvars Þórðarsonar og Júlíusar Kemp en Júlíus er einmitt leikstjóri myndarinnar. Af myndunum sem birtar eru á Twitchfilm er hér á ferðinni blóðug hrollvekja enda myndirnar hverjar heldur betur skuggalegar.

Með hlutverk í myndinni fara meðal annars Helgi Björnsson, Gunnar Hansen, Ragnhildur Steinunn, Þorvaldur Davíð Kristjánsson, Stefán Jónsson, Halldóra Geirharðsdóttir, Snorri Engilbertsson og Guðlaug Elísabet Ólafsdóttir auk fjölda erlendra leikara.

Á myndunum má meðal annars sjá Ragnhildi Steinunni með stutt, brúnt hár í sínu hlutverki og leiklistarnemann Þorvald Davíð Kristjánsson með aflitað hár og demantslokk í eyranu. Helgi Björnsson sem leikur „vonda karlinn“ í myndinni er líka heldur ófrýnilegur og sjúskaður að sjá.

Eins og DV greindi frá í síðustu viku verður Reykjavik Whale Watching Massacre frumsýnd á kvikmyndahátíðinni í Cannes næsta vor.