Sjö ný gena afbrigði sem vísindamenn hafa uppgötvað gefa sterklega til kynna að offita sé að stórum hluta andlegt vandmál. Samkvæmt rannsóknum á heilinn stóran þátt í að stjórna matarlyst og að erfitt sé að varpa sökinni á efnaskipti. Til grundvallar niðurstöðum rannsóknarinnar liggja sýni úr þúsundum manns, og virkni margra þeirra sjö afbrigða sem um ræðir virðist vera í heilanum.

Afbrigðin sjö fundust öll í rannsókn undir forystu deCode, móðurfélags Íslenskrar erfðagreiningar, en sex þeirra fundust í annarri sjálfstæðri rannsókn alþjóðlegra vísindamanna, undir nafninu Giant.
Í báðum rannsóknum rannsökuðu vísindamenn erfðaefni úr þúsundum manns til að meta áhrif smávægilegra breytinga.

„Þetta gefur til kynna að í leit okkar að leiðum til að sporna gegn offitu, verðum við að að einbeita okkur, að minnsta kosti jafnmikið, að því sem stjórnar matarlyst og þeim þætti sem snýr að efnaskiptum og því hvernig líkaminn nýtir og geymir orku,“ sagði Kári Stefánsson hjá deCode.

Skiptar skoðanir eru á meðal vísindamanna um niðurstöður rannsóknanna og einn þeirra sem telur að fara þurfi varlega í sakirnar er Peter Weissberg hjá British Heart Foundation. Að hans mati sýnir rannsóknin að sumu fólki er hættara en öðru að verða offitu að bráð vegna gena. „En þetta getur ekki verið skýringin á þeim offitufaraldri sem geisar nú um stundir, því þessi gen hafa verið til staðar öldum saman og offitufaraldurinn er tiltölulega nýtt fyrirbæri,“ sagði Weissberg.