Sjö rússneskir kynþáttahatarar hafa verið dæmdir í sex til tuttugu ára fangelsi fyrir hrottaleg morð sem hópurinn framdi frá ágúst 2006 til október 2007. Mennirnir voru sakfelldir fyrir morð á tuttugu mönnum en auk þess fyrir morðtilraunir við tólf aðra. Ofbeldisverkin áttu sér stað í Moskvu.

Roman Kuzin fékk þyngsta dóminn, eða tuttugu ára fangelsi. Hópurinn tók hluta af ofbeldisbrotum sínum upp og setti myndböndin á Internetið. Allir mennirnir sem um ræðir voru undir lögaldri þegar brotin voru framin. Ofbeldisbrotin beindust aðallega gegn innflytjendum frá Asíu og Kákasuslöndum gömlu Sovétríkjanna.