Þvörusleikir afhenti Jóhönnu Sigurðardóttur félagsmálaráðherra kartöflu og sleif rétt eftir hádegi í dag í Alþingishúsinu.
"Ég vil byrja á því að þakka þér fyrir þín störf í þágu fatlaðra, aldraðra og annarra, sem vilja því miður oft verða undir í samfélagi sem leggur meiri áheyrslu á peninga en fólk,“ sagði Þvörusleikir við þetta tilefni, og bætti við:

„Hinsvegar er það ábyrgðarhluti hjá þér að hafa hafnað vantrausti á ríkistjórn sem er nú þegar farin að beita niðurskurði gegn þínum góðu verkum og er líkleg til að standa gegn þér í framtíðinni. Því færð þú hér með kartöflu, vegna mikillar óþekktar. Einnig afhendi ég þér þessa sleif svo þú getir rasskellt hina óhæfu ráðherra og hrært aðeins upp í þessari blessuðu ríkistjórn,“ sagði Þvörusleikir en Jóhanna þakkaði pent fyrir sig að því er kemur fram í tilkynningu frá umboðsmanni jólasveinanna.

Guðlaugur Þór Þórðarson heilbrigðisráðherra og Einar K. Guðfinnsson landbúnaðar- og sjávarútvegsráðherra hafa þegar fengið kartöflur í skóinn, eins og komið hefur fram á dv.is

Guðlaugur Þór fékk kartöfluna fyrir að styðja ekki við ljósmæður í verkfalli sínu. Að mati Guðlaugs var heimsókn jólasveinsins „kjánaleg.“ Einar K. fékk kartöflu fyrir að viðhalda kvótakerfinu. Honum fannst viðeigandi að fá kartöflu í skóinn á ári kartöflunnar.